یاشام منظومه سی (بابک قوجازاده)
بورا تئاتر سئنی ، بیرینجی پرده
دایانیب بیر اوغلان کوچه باشیندا
گلن لر – گئدنلر لاپ تله سیرلر
سویویوب اوره یی ، گنجلیک یاشیندا
سئودییی بیر گؤزل پنجره سینده
ایتیبدیر گؤرونمور نئچه گئجه دیر
بیلمزسن ، بیلمه رم ، بیلمه ریک بئله
اورداکی اوغلانین حالی نئجه دیر
بلکه ده نه بیلیم بو ایلک سئوگیسی
داشلارا چیرپیلیب پارام - پارچادیر
آللاها شیکایت نه ائتمک اولار
طالعی چکنلر رنگدیر ، فیرچادیر
بورا تئاتر سئنی ، ایکینجی پرده
بیر ماهنی اوجالیب آللاها چاتیر
اورادا اَیله شن بیگلر ، جنابلار
اورکدن کدری بیر یانا آتیر
یوخ ! یوخ ! اوخشاتمایین بو شعری سیز ده
قدیم ناغیللارا ، اسکی شعرلره
بوراسی نه تویدو نه ده کی قیزی
گلین کؤچوردورلر اوزاق یئرلره
آنجاق کی بورادا پولدور دانیشان
جنابلار دونیانی ساتیب - آلیرلار
هردن ده اوتوزوب قومارلاریندا
درین بیر کدره ، فیکره دالیرلار
بورایا سئوگینین یولو دا دوشمز
آزارسا سئوگینین ساچین بویارلار
سونرا فرانسادا، بیر کازینودا
بؤیوک، طنطنه لی حراج قویارلار
بورا تئاتر سئنی اوچونجو پرده
بیر کیشی آروادین بوشاییب گئدیر
بلکه ده او کیشی بئله دوشونور
بو گوندن گزدییی دینجلییه یئتیر!
کیشی گئده – گئده چیراقلار سؤنور
سنین بوجاغیندا بیر اوشاق دوروب
آنا دا باش آلیب گئدیر بیریانا
اوشاغی زالداکی باخیشلار یوروب
بیری گولومسه ییر ، بیری آغلاییر
بیری هوروت – هوروت باخیر صحنه یه
اوشاغین گؤزلرین یاغیش آپاریر
بو پرده قورتولوب ، باغلانیر یئنه ...
بورا تئاتر سئنی دؤردونجو پرده
اعتصاب میتینگی ، بیری هایلانیب
"کیملر ایش آختاریر کیمسه لر ایشده ؟!"
عنوانلار یوخودا دونن پایلانیب!...
سانما تکجه چؤرک یوخدور اینسانا
گئجه لر ، شهرده آج قارین یاتیر
گئجه نین بوغونتو قارانلیغیندا
بیر اینسان بو یئرین داشینی آتیر
گئدیب باشقا یوردا آدین دَییشیب
حیاتین لذّتین او یئرده آنیر
تیکیلسین دوداغیم دئمه ییم بونو:
یوردونو، تاریخین، آتاسین دانیر
تاریخی وارلیلار، اودانلار یازار
یوخسوللار افسانه قوشوب – یارالدار
هردن جیزیق چکیب اؤز دؤره سینه
دونیانی اؤز الی اونا دارالدار...
بورا تئاتر سئنی ، بئشینجی پرده
دایانیب بیر اوغلان کوچه باشیندا
ائله بیل او آندا ساعاتلار دونوب
آلیشیب اوره یی، گنجلیک یاشیندا
او قیزین باخیشی یئتر اوغلانا
واری دا – یوخو دا ، او گؤزلرده دیر
اونا نه لازیمدیر ژاپن ، فیرانسا
حیاتین لذّتی بو سؤزلرده دیر...
پرده لر باغلانیر، چیراقلار سؤنور
بیر سئوگی دونیانی ساتین آلیبدیر
بیر اوغلان هله ده کوچه باشیندا،
شیرین خیاللارا، فیکره دالیبدیر!...
(بابک قوجازاده )
• آیدین سرداری نیا