منیم کیمی بیریسینه چوخ چتیندیر! دوغرودان چوخ چتین! او قدر چتین کی بوگون اونونلا گؤروشمک سعادتی منه بیر داها قیسمت اولماق بیر یاندان همیشه کی کیمی دیله سیغماز بیر بخته ورلیک اولموش اولسا دا، بیر یاندان اوره ییم نیسگیللی قالدی. منیم کیمی ائو اوشاغی اولان بیریسی نه سربازلیق خیدمتینه گئتمیش نه ده لیسانس دؤنمینی باشقا بیر شهرده اوخویارکن قدیمکیلر دئمیشکن آدام اولموش بیریسی اولمادیغیم حالدا بوگون 2011-جی ایل ائکیم آیینین اون سکگیزی، ائودن آیریلالی اون دوققوز گون دولوبدور. ائودن آیریلیب آنکارایا گلمه م درس اوخوماق هدفی ایله اولسا دا آناملا باجیمی تک بیر ائوده بوراخیب باشقا اؤلکه یه گلمک منیم کیمی دانقازلیق ایستر.

هر حالدا اون دوققوز گون تیلیفون دالیندا آناملا دانیشدیغیم هر بیر دفعه فیلیم اویناییب یوخ هر شئی یئرینده دیر دئمک آداما نه توخداقلیغی وئره بیلر کی، اؤزو ده بیر حالدا کی دونیادا بالاسینین اوره ییندن کئچنی بیلمه ین آنا تاپیلمایان حالدا، حتی بئله تیلیفون آرخاسیندا دا اولموش اولسا. بئله بیر حالدا بؤیوک بابام... اوه اوه کیریخدیم! اوستادیم... بلی، اوستادیمیز دوکتور هئیت ی آنکارادا گؤرمک... اوووووف آداما ائله یاپیشار... ائله یاپیشار کی ها... لاپ ائله کوکو دادی وئرر با! بو لاپ آدامین ان یاخین قوهوملاریندان بیریسینی گؤرمکدیر سانکی. اوندا کی دوکتور هیئت 86 یاشیندایکن حافیظه سیندن باشقالارینین نئچه برابری ایش چکدییینه گؤره بیریسی ایله گؤروشرکن هله هله خاطیرلامادیغی حالدا منی گؤرجک تانیییر! اوندا کی زمانه میزین دده قورقودو آدلانان دوکتور هیئت ین گؤروشونه گئدنلر بیر بیر اؤزلرینی تانیتدیرماق مجبوریتینده قالدیقلاری زامان سیرا منه چاتدیغیندا دوکتور هیئت بویورورلار: "قوی سنی من تانیتدیریم!" و یا مجلیسین سونوندا هامی دوکتور هیئت له عکس سالدیرماق ایسته دییی حالدا منه سؤیلورلر: "به سن مننن عکس سالدیرماق ایسته میرسن؟! آخی سن بیزه ایکی قات عزیزسن!" آدام بئلنچی شراییطده منیم کیمی پافئت اولمالیدیر کی زورلا اؤزونو ساخلاییب بو عظمتده بیر اینسانی باغرینا باسماسین.

اؤز آرامیزدیر 70-80 نفرلیک بیر جمعده یوخاریدا دئدییین ایستکلریوین یئرینه یئتیریلمه سی ائله ده راحات ایش دئییلدی دا آخی آیدین سن ده! آما یئنه اؤز آرامیزدیر همیشه کی تجروبه م بیر داها تکرار اولدو: پروفسور دوکتور جواد هیئت حضرتلری ایله گؤروشمک منی اؤز گنجلیییمدن اوتاندیردی، هم ده بوللو ائنئرژیلندیردی! اؤزللیکله ده کی بو اولو اینسان قاپی آغزیندا سون ساغ اوللاشماسینی ائدرکن: "من بوگون 16 یاش جاوانلاشدیم،"- سؤیله دیکلری حالدا.